Tirana ishte ndalesa e gjashtë e Javës së Filmit Turk që do të zhvillohet në 6 qytete të ndryshme të botës me kontributin e Drejtorisë së Përgjithshme të Kinemasë që ka për qëllim njohjen dhe përhapjen e sektorit të kinematografisë turke. Në sallën e Kinema Millennium në Tiranë, Shqipëri në datat 22 – 26 nëntor 2021, për 5 ditë me radhë u shfaqën 5 filma pa pagesë duke përfshirë edhe një film për fëmijë.

Hapja e Javës së Filmit Turk u realizua me pjesëmarrjen e Ambasadorit të Republikës së Turqisë në Tiranë z. Murat Ahmet Yörük, politikanëve, antarëve të OJF-ve, akademikëve, gazetarëve, studentëve dhe shqiptarëve dashamirës të kinemasë më 22 nëntor 2021, në Kinema Millennium, ora 13.30.

Aktiviteti u hap me filmin dramë “Mrekullia në Qelinë Nr.7”, me regji të Mehmet Ada Öztekin dhe në rolet kryesore me aktorët Aras Bulut İynemli dhe Nisa Sofiya Aksungur.

Dita e dytë vazhdoi me filmin “Për Ne Kampion” me regji të Katıksız dhe në rolet kryesore luanin aktorët Ekin Koç, Farah Zeynep Abdullah dhe Fikret Kuşkan.

Në ditën e tretë dhe të katërt aktiviteti vazhdoi me filmin për fëmijë “Rafadan Tayfa Aventura në Tunel” me regji të İsmail Fidan dhe filmin e parë me metrazh të gjatë të Cem Özay “Falja”.

Më 26 nëntor 2021, në ditën e fundit të Javës së Filmit Turk u zhvillua promovimi i librit dhe shfaqja e filmit “Kandidati për Kryetar” të Ercan Kesal-it, një ndër emrave më të spikatur të kinemasë turke.

Ambasadori i Republikës së Turqisë në Tiranë z. Murat Ahmet Yörük, në fjalën e tij u shpreh se Kesal është një njeri i madh i kulturës dhe artit turk.

Yörük tha se "Jam shumë i lumtur që pres Ercan Kesal-in, një artist, një mendimtar, një shkrimtar, i cili është një nga vlerat më të mëdha që ka kinemaja dhe letërsia bashkëkohore turke. Sigurisht, Turqia ka këtu një ekip shumë të fortë, për të treguar vlerat e kulturës turke.”

Ndërsa Drejtori i Insitutit Junus Emre Tiranë z. Ömer Osman Demirbaş deklaroi se gjatë kësaj jave janë shfaqur filmat turq që janë ndjekur shumë nga publiku.

Drejtori i Shtëpisë Botuese “Fan Noli” z. Rexhep Hida theksoi se shtëpia botuese në fjalë përkthen dhe boton vepra të autorëve turq.

Pas fjalës përshëndetëse, Kesal ndau eksperiencën e tij me të pranishmit dhe theksoi se me filmin dhe librin “Kandidati për Kryetar” përpiqet të tregojë jetën e një personi që ndjek pushtetin dhe lojërat e tij.

Kesal u shpreh se filmat që ka shkruar dhe ku ka marrë pjesë, më së shumti mund të klasifikohen si arti i kinemasë dhe shtoi se është nga ata persona që besojnë se kinemaja është një institucion estetik dhe i drejtë.

Në fund të aktivitetit u shfaq filmi “Kandidati për Kryetar” me skenar të Ercan Kesal-it në të cilin ai luan dhe rolin kryesor.